Sunday, December 30, 2012

Sajak-sajak Fitri Yani

Sekala

kisahni kambang
sai wat di cerita-cerita ulun tumbai
cerita sai tuoh di lamban-lamban tuha
:batang sekala
sai nandok
di sigor-sigor kebayan

tuoh di pullan tuha
di hantara batang-batang balak
di pingger-pingger halian
kambangni mekar

debingi derani
tuoh tenggalan
di lom musim
sai buganti-ganti

sapa sai ngehaluni
sai lapah nengah bara
di lom pullan
injuk ngeliak mahkota
sai nyenangko hati
mak ngedok niat
aga matohko kambangni
jak batang
nyin ya tuoh
di sigor-sigorni
kebayan.


2012


Imbun Semawas

imbun nandok di bulungni kekambang, lunap nyimpok ranglaya. sunyinni aga lebon, ingkah jadi ingoan semakung pedom. injuk lamban paser sai tisani di pinggir laok dibi nambi. niku mawek pandai lagi jama sapa ngedadah ko culuk. lamban sai selalu tiratongi di lom hanipi setemonni temon nyata, sangon rakakni, lamban panggungni, rik kambang sai tuoh di tengebahni mawek sehelau sai di lom angangonmu. kidang renglaya lunik rangni sanak kekucak sai dipingger-pinggerni dituohi tanoman handak jelas nebong mid lamban lunik, rangmu selalu ngulangko hanipi. kambang-kambangni kupi sai begugorang rik tanoman-tanoman kol warna biru timpuk di sejaoh mata ngeliak. injuk nunggu kundang sai induh sakani lapah di kota lain. rakak-rakak rik bebukitan halok jaoh jak kemilau laok. kidang halian rilau sai ngelihi injuk kebayan wewah pudak sai ngehili mid hilirni.

sapa sai dapok ngeniko kahut mid uluh sai mak pasti, injuk kekambang, darak pari, rik tihang-tihang sai cadang kena terai. api sai setemonni titunggu waktu bulan bara, waktu niku nyenop jak sekapan sai tebukak cutik. api sai setemonni ditunggu? injuk nunggu wat sai nyaka’i jan. kidang ingkah didengi bunyi jantungmu tenggalan sai kengisonan. bebingi-bingi niku mak pedom, nunggu imbun semawas.

di lom pullan gugor di bebuahan rik bebulungan, wat sai gugor muneh di unggak hatok, ya lain terai. di jukuk-jukuk selanggar tuot, di kekambang sai selalu diratongi alibambang, imbun gogor pelejohan.

Niku senangon terok pandai warnani imbun sai temon rik utuh unggal semawas, kidang niku muneh aga lupa jama matani rani sai ngenini cahaya. Induh kapan niku temon-temon yakin bahwa hanipi tentang rengkaya lunik, lamban-lamban panggung, kekambangni kupi radu ngesai di lom kenangan, sai radu pasti aga dikeni imbun jak matamu.

2012


Penerai

burung kenui kambor di langik kelom
lima menit sai radu terai kedok jak pagi
way ngegenang di ranglaya
sanak lunik kekucak nyepok iwa tanyut

bulung-bulung basoh
kambang-kambang basoh

way ngehali di pemetung
pari-pari kehujauan
pematang disimpok lunap

selain terai, dibi saiya
wat muneh sai ratong
benang-benang cahaya jak langik
langik sekecah way nohan

di renglaya sedi
kita betungga di tengah terai
maka sunyinni cerita bermula
injuk kulam-kulam sai gugori cahaya
injuk kambangni jambu suluh
begugoran di tengebah.

2012


Labuhan lain


umbak pecoh di karang
pecoh angangonku ngingokko niku
injuk langui di laok kerui
induh dipa rangku pehalu jukung

cawamu injuk torni memis madu
kidang nyak tepik duli diya
ngebabang hati cadang
tekebang maya di langik jaoh
labuhan kapalmu lain sai

2012

--------
Fitri Yani, laher di Liwa, Lampung Barat, 28 Februari 1986. Tinggal di Bandar Lampung. Alumnus FKIP Universitas Lampung. Buku puisini, Dermaga Tak Bernama (2010). Sajak-sajakni sai bareh tekuruk di media cetak dan antologi jejama.


Lampung Post, Minggu, 30 Desember 2012